Быел татар халык язучысы, җәмәгать эшлеклесе һәм РСФСРның атказанган сәнгать эшлеклесе *Гариф Ахунов*ның тууына 100 ел. Шул уңайдан 11 сентябрьдән Татарстан Милли музее филиалы – Татар китабы йортында аңа багышланган күргәзмә эшли башлый.
«Гариф Ахунов. Гаилә хәзинәсе» күргәзмәсендә язучыга якын булган Ахуновлар гаиләсенең шәхси архивыннан әйберләр тәкъдим ителәчәк. Бу – гаилә предметлары һәм фотосурәтләр, шәхси китаплар, шулай ук рәсем ясау өчен пумалалар һәм рәсем. Фотосурәтләрдә Гариф Ахунов күпкырлы шәхес, язучы һәм әдәби тәнкыйтьче, рәссам һәм гаиләне яратучы буларак тәкъдим ителәчәк», – дип хәбәр итә музейның матбугат хезмәте.
Күргәзмә 12 октябрьгә кадәр эшләячәк, аның программасы кысаларында экскурсияләр һәм «Хәзинә» фильмы күрсәтеләчәк.
- Гарифҗан Ахунҗан улы Ахунов (Гариф Ахунов) – 1925 елның 18 сентябрендә Арча районы Өчиле авылында күп балалы крестьян гаиләсендә туа. Белем нигезләрен Казанбаш авылы мәктәбендә, аннары Арча педагогия училищесында ала. 1947 елда Казан дәүләт университетының тарих-филология факультетында укый.
- Гариф Ахунов әдәби даирәләргә университетның соңгы курсларында ук катнаша. Әсәрләре 1951 елда басыла башлый. Аның студент яшьләре тормышы турында «Яшьлек яме» дигән беренче зур әсәре 1950 елларда басыла. Шулай итеп, Ахунов үзенең иҗат эшчәнлеген башлап җибәрү белән, үз чорын чагылдырган әдәби әсәрләр яза башлый.
- Әдәби әсәрләрендә ул үзенең замандаш дуслары, нефтьчеләр, авыл хезмәтчәннәре, сәнәгать җитәкчеләре турында яза. Татарстан нефтьчеләре турында язылган «Хәзинә» романы һәм «Чикләвек төш» повесте өчен ТАССРның Габдулла Тукай исемендәге Дәүләт премиясе белән бүләкләнгән. Гариф Ахунов, язучы буларак кына түгел, драматург, тәрҗемәче, мөхәррир, җәмәгать һәм сәясәт эшлеклесе буларак та билгеле
ТР Милли музее матбугат хезмәте һәм Т.И.