#музейонлайн сәхифәсен дәвам итәбез.
Карантин да үзизоляция дә камилләшүгә, белем алуга комачауларга тиеш түгел. Шуңа күрә «Музей – сезнең өегездә» дигән акция тәкъдим итәбез. Бер ай дәвамында без сезгә Татар әдәбияты тарихы һәм Шәриф Камал мемориаль фатиры буенча онлайн экскурсияләр күрсәтербез һәм экспонатлар белән таныштырырбыз.
Бүгенге экспонатыбыз – Мөхәммәдьярның данлыклы «Нуры содур» поэмасы язылган китап.
«Имди әйтәйем китабым атыны,
Нәзым итәйем, тыңлаңыз әбйатыны:
«Нуры содур» аты, и шаһы җиһан,
Һәр кеше кем укыса аны, рәван…»
Рәсемдә – татар шагыйре Мөхәммәдьярның данлыклы «Нуры содур» – («Күңелләр нуры») поэмасы.
Әсәр ун бабтан тора: гаделлек, рәхим-шәфкать, сәха (юмартлык), хәя (оялчанлык), газа (сугышчанлык), сабырлык, вафа (сүздә тору), сыйдык (туры сүзле булу), самит (аз сүзлелек), гафу итү турында.
Гадел кыйлмак сүзләре…
«Гадел кыйлса падишаһ бер дәм[бер мизгел], ишет,
Ил-улус гадел берлә тапса мәшият[ирек]»
Сыйдык [дөреслек, чынлык] сүзләре…
«Төрки теленчә сыйдык, мәгънәсен белең –
Күнилүк [дөреслек] берлә һәмишә [һәрчак] эш кыйлың»
Гафу кыйлмак сүзләре…
«Гафу кыйлмак берлә булыр ир газиз,
Гафу кыйл барчадин, и гакълы тәмиз[җитеш]»
#музейонлайн
#онлайнмузей
#татаркитабыйорты
